សមិទ្ធផលការងារត្រួតពិនិត្យផលិតផលថ្នាំជក់មាន៖
១.ការដាក់សារព្រមានសុខភាពជាភាសាខ្មែរនិងជារូបភាព លើកញ្ចប់ផលិតផលថ្នាំជក់ ទំហំ៥៥% សម្រេចបានតាមសូចនាករ។ កន្លងទៅនេះក្រសួងសុខាភិបាលបានចេញសេចក្តីណែនាំថ្មី ដោយតម្រូវឱ្យគ្រប់ក្រុមហ៊ុនផលិតផលថ្នាំជក់ទាំងអស់ត្រូវបោះពុម្ពសារព្រមានសុខភាពជាភាសាខ្មែរ និងជារូបភាពលើកពា្ចប់ផលិតផលថ្នាំជក់ថ្មីពីរទៀតគឺ រូបភាពជក់បារីបណ្តាលឱ្យកើតជំងឺហើមសួត និងរូបភាពជក់បារី បណ្តាលឱ្យកើតជំងឺបេះដូង។
២. ការអនុវត្តវិធានការហាមការជក់ ឬការបង្ហុយផ្សែងផលិតផលថ្នាំជក់នៅកន្លែងធ្វើការ ឬកន្លែងសាធារណៈ មានការរីកចម្រើនជាពិសេសនៅតាមគ្រឹះស្ថានធ្វើការទាំងរដ្ឋ និងឯកជន សណ្ឋាគារ និងភោជនីយដ្ឋាន។ លើសពីនេះថ្នាក់ដឹកនាំ រាជធានី ខេត្ត ៦ គឺខេត្តបាត់ដំបង សៀមរាប កំពង់ចាម ព្រះសីហនុ កណ្តាល និងរាជធានីភ្នំពេញ បានប្តេជ្ញាចិត្ត បង្កើតជាបណ្តាញទីក្រុងគ្មានផ្សែងបារី និងការពារជំងឺមិនឆ្លងនៅកម្ពុជា ដែលឆ្ពោះទៅរកការបង្កើតទីក្រុងគ្មានផ្សែងបារីនៅឆ្នាំ២០២៣ ។
៣. អនុវត្តវិធានការហាមឃាត់ការផ្សាយពាណិជ្ជកម្មបានប្រសើរ ដោយលប់បំបាត់ទាំងស្រុង ការផ្សព្វផ្សាយលក់ និងការឧបត្ថម្ភកម្មវិធីដោយឧស្សាហករថ្នាំជក់ តាមរយៈវិទ្យុ ទូរទស្សន៍ កាសែត ទស្សនាវដ្តីក្នុងស្រុក និងផ្ទាំងប៉ាណូធំៗ។ ការផ្សព្វផ្សាយនៅតាមទីតាំងលក់រាយត្រូវបានកាត់បន្ថយ តែមិនទាន់លុបបំបាត់បានទាំងស្រុងនៅឡើយ។
៤. មជ្ឈមណ្ឌលជាតិលើកកំពស់សុខភាពសហការជាមួយនាយកដ្ឋាននគរបាលប្រឆាំងបទល្មើសសេដ្ឋកិច្ចនៃអគ្គស្នងការដ្ឋាននគរបាលជាតិនៃក្រសួងមហាផ្ទៃ ដើម្បីចុះពិនិត្យតាមដានដល់កន្លែងពីស្ថានភាពបារីដែលមិនបានដាក់សារព្រមានសុខភាព។
៥. យន្តការត្រួតពិនិត្យផលិតផលថ្នាំជក់ និងការអនុវត្តច្បាប់់ត្រូវបានពង្រឹងជាបន្តបន្ទាប់៖
- បានរៀបចំសិក្ខាសាលាស្តីពី ភាពជាអ្នកដឹកនាំក្នុងការអនុវត្តច្បាប់ និងលិខិតបទដ្ឋានគតិយុត្តនានាស្តីពី ការត្រួតពិនិត្យផលិតផលថ្នាំជក់ដល់អាជ្ញាធរថ្នាក់ក្រោមជាតិ។
- បានរៀបចំបើកវគ្គបណ្តុះបណ្តាលគ្រូបង្គោលស្តីពី ការផ្តល់ប្រឹក្សាដើម្បីលះបង់ទម្លាប់ជក់បារីនៅមន្ទីរសុខាភិបាលនៃរដ្ឋបាលខេត្ត
- រាជរដ្ឋាភិបាលបានអនុម័តលើសេចក្ដីសម្រេចស្ដីពី ការតែងតាំងសមាសភាពរបស់គណៈកម្មាធិការត្រួតពិនិត្យផលិតផលថ្នាំជក់ (គ.ត.ផ.ថ)
- បានបណ្តុះបណ្តាលមន្រ្តីអធិការកិច្ចផលិតផលថ្នាំជក់
ដោយមានការគាំទ្រ សហការល្អ និងមានការប្រឹងប្រែងពីថ្នាក់ដឹកនាំកំពូលនៃរាជរដ្ឋាភិបាល គណៈកម្មាធិការត្រួតពិនិត្យផលិតផលថ្នាំជក់ ក្រសួងសុខាភិបាល ស្ថាប័នជាតិ អន្តរជាតិ អង្គការមិនមែន រដ្ឋាភិបាល អជ្ញាថ្នាក់ជាតិ ខេត្ត-ក្រុង និងសហគមន៍ ជាពិសេសការការប្តេជ្ញាចិត្តខិតខំប្រឹងប្រែង និងការគាំទ្រតាមគ្រប់រូបភាពពីសំណាក់ឯកឧត្តមរដ្ឋមន្ត្រីក្រសួងសុខាភិបាលលើការងារទប់ស្កាត់ការប្រើប្រាស់ថ្នាំជក់ ។
តម្រូវការឱ្យមានការបន្តការខិតខំប្រឹងប្រែង ការប្តេជ្ញាចិត្ត និងការចូលរួមពីគ្រប់ភាគីពាក់ព័ន្ធក្នុងការទប់ស្កាត់ការប្រើប្រាស់ថ្នាំជក់។ មជ្ឈមណ្ឌលជាតិលើកកំពស់សុខភាព ដែលជាសេនាធិការជំនាញទទួលបន្ទុកលើការងារទប់ស្កាត់ការប្រើប្រាស់ថ្នាំជក់មានទិសដៅ៖
- បន្តជំរុញការអនុវត្តច្បាប់ និងលិខិតបទដ្ឋានគតិយុត្តនានាស្តីពី ការត្រួតពិនិត្យផលិតផលថ្នាំជក់ឱ្យមានប្រសិទ្ធភាពខ្ពស់
- ពង្រីកទំហំការបោះពុម្ពរូបភាព និងសារព្រមានសុខភាពជាភាសាខ្មែរលើកញ្ចប់បារីអោយបានដល់៩០%
- ពង្រឹងយន្តការត្រួតពិនិត្យផលិតផលថ្នាំជក់នៅថ្នាក់ជាតិ ថ្នាក់ក្រោមជាតិ ដើម្បីការអប់រំ និងអនុវត្តច្បាប់ស្តីពី ការត្រួតពិនិត្យផលិតផលថ្នាំជក់។
- ជំរុញការចុះអធិការកិច្ចផលិតផលថ្នាំជក់។