មជ្ឈមណ្ឌលជាតិលើកកំពស់សុខភាព នៃក្រសួងសុខាភិបាលត្រូវបានបង្កើតឡើងក្នុងឆ្នាំ១៩៩៧ ។ ពីឆ្នាំ១៩៨៥ ដល់ឆ្នាំ១៩៩៧ មជ្ឈមណ្ឌលនេះមានឈ្មោះថា មជ្ឈមណ្ឌលអនាម័យ អប់រំសុខភាព និងថែទាំសុខភាពបឋម ។ មជ្ឈមណ្ឌលជាតិលើកកំពស់សុខភាព ជាសេនាធិការរបស់ក្រសួងសុខាភិបាលក្នុងការប្រាស្រ័យទាក់ទងដើម្បីផ្លាស់ប្តូរឥរិយាបថរបស់សាធារណជន និងជំរុញការផ្លាស់ប្តូរឥរិយាបថរបស់អ្នកផ្តល់សេវាសុខភាព ការត្រួតពិនិត្យថ្នាំជក់និងគ្រឿងស្រវឹង ការអនុវត្តសិទ្ធិអតិថិជន និងសិទ្ធិ-កាតព្វកិច្ចអ្នកផ្តល់សេវា និងពង្រឹងប្រព័ន្ធជំរុញការចូលរួមរបស់សហគមន៍ ដោយបង្កើតជាគោលនយោបាយជាតិ សេចក្តីណែនាំ ច្បាប់លិខិតបទដ្ឋានគតិយុត្ត និងរៀបចំការពង្រឹងសមត្ថភាព ។ មជ្ឈមណ្ឌលជាតិលើកកំពស់សុខភាព មានទំនួលខុសត្រូវក្នុងការផ្តល់បច្ចេកទេស និងសម្របសម្រួលជាមួយ មន្ទីរសុខាភិបាលទូទាំងប្រទេស តាមរយៈផ្នែកលើកកម្ពស់សុខភាព ។
មជ្ឈមណ្ឌលជាតិលើកកំពស់សុខភាព មាននិម្មិតសញ្ញាដូចខាងក្រោម ៖
- និម្មិតសញ្ញានេះ មានរូបមនុស្សស្រីម្នាក់ប្រុសម្នាក់ និងកុមារា-កុមារីពីរនាក់ តំណាងឱ្យគ្រួសារមានសុខភាពល្អ ។ រូបឆ័ត្រតំណាងឱ្យគោលការណ៍ទាំងបីនៃសុខភាព គឺការបង្ការ ការអប់រំ និង ការលើកកម្ពស់សុខភាព ។
- និម្មិតសញ្ញាទាំងមូលមានពណ៌បៃតង តំណាងឱ្យបរិស្ថានមានសុខភាព។
- និមិ្មតសញ្ញានេះមានចំណងជើងជាភាសាខ្មែរ "មជ្ឈមណ្ឌលជាតិលើកកំពស់សុខភាព" នៅពីលើ និងមានអក្សរកាត់ "មជលស" នៅផ្នែកខាងឆ្វេង ។ ចំណងជើងជាភាសាអង់គ្លេសអានថា" National Centre for Health Promotion" នៅខាងក្រោម និងមានអក្សរកាត់ "NCHP" នៅផ្នែកខាងស្តាំ ៕
