ផ្នែកបណ្តុះបណ្តាល ស្ថិតនៅក្រោមការគ្រប់គ្រងដោយផ្ទាល់របស់ការិយាល័យបច្ចេកទេស នៃមជ្ឈមណ្ឌលជាតិលើកកំពស់សុខភាព ។ ផ្នែកនេះមានសារសំខាន់ណាស់ក្នុងការបង្កើនសមត្ថភាពដល់មន្ត្រីសុខាភិបាលទាំងថ្នាក់ជាតិ និងថ្នាក់ក្រោមជាតិ រួមទាំងមន្ត្រីដែលធ្វើការនៅបណ្តាអង្គការនានាដែលធ្វើការងារផ្នែកលើកកំពស់សុខភាព ។ ការបង្កើនសមត្ថភាពបានផ្តល់នូវចំណេះដឹង ជំនាញ និងឥរិយាបថល្អដល់មន្ត្រីទាំងនោះ ដោយប្រើប្រាស់វិធីសាស្រ្តបង្រៀនតាមបែបចូលរួម ។
ផ្នែកបណ្តុះបណ្តាលបានចងក្រង និងបណ្តុះបណ្តាលអំពី សិទ្ធិអតិថិជន និងសិទ្ធិ-កាតព្វកិច្ចអ្នកផ្តល់សេវាសុខាភិបាល, សមាហរណកម្មនៃការទទួលបន្ទុកពិនិត្យនិងព្យាបាលជំងឺនៅសហគមន៍, សំណុំសកម្មភាពអប្បបរមាម៉ូឌុលទី៧ ស្តីពីការលើកកម្ពស់សុខភាព ការផ្លាស់ប្តូវឥរិយាបថសម្រាប់មណ្ឌលសុខភាព ។ ផ្នែកមិនត្រឹមតែបណ្តុះបណ្តាលប៉ុណ្ណោះទេ តែថែមទាំងធ្វើការតាមដាន, អភិបាល ក្នុងការអនុវត្តន៍សិទ្ធិអតិថិជន និងសិទ្ធិ-កាតព្វកិច្ចអ្នកផ្តល់សេវាសុខាភិបាលនៅការិយាល័យសុខាភិបាលស្រុកប្រតិបត្តិ, មន្ទីរសុខាភិបាលខេត្តទូទាំងប្រទេសផងដែរ ។
ផ្នែកបណ្តុះបណ្តាលបានចងក្រងសៀវភៅអំពី "ការយល់ដឹងពីការថែទាំសុខភាពសហគមន៍" ដោយមានការសហការពីនាយកដ្ឋានការពារសុខភាព នាយកដ្ឋានមន្ទីរពេទ្យ នាយកដ្ឋានប្រយុទ្ធនឹងជំងឺឆ្លង មជ្ឈមណ្ឌលជាតិគាំពារមាតា និងទារក ព្រមទាំងមន្ទីរសុខាភិបាលខេត្តកំពត កំពង់ស្ពឺ កំពង់ធំ និងអង្គការសុខភាពពិភពលោក សម្រាប់យកទៅប្រើប្រាស់ក្នុងការផ្តល់ព័ត៌មានជូនដល់ប្រជាជនទូទាំងប្រទេសឲ្យមានចំណេះដឹងអំពីសុខភាពដែលជាប្រយោជន៍ជំរុញឲ្យពួកគេមានទម្លាប់រស់នៅប្រកបដោយសុខភាព និងលើកកំពស់ការប្រើប្រាស់សេវាសុខាភិបាលប្រកបដោយប្រសិទ្ធភាព ។
